ଶୀତରେ ଥରିଲାଣି ଦାରିଙ୍ଗବାଡ଼ି
(କନ୍ଧମାଳ,ଓଡ଼ିଶା ଟାଇମ୍): କନ୍ଧମାଳ ଜିଲ୍ଲାରେ ଧୀରେ ଧୀରେ ଶୀତ ତାର ଆସର ମେଲିଲାଣି । ରବିବାର ଦାରିଙ୍ଗବାଡ଼ିରେ ପାରଦ ତଳମୁହାଁ ହୋଇ ୯ ଡିଗ୍ରୀରେ ପହଞ୍ଚିଛି । ଯାହାଫଳରେ ଅଞ୍ଚଳରେ ପ୍ରବଳରୁ ଅତି ପ୍ରବଳ ଶୀତ ଅନୁଭୂତ ହେଉଛି । ଶୀତ ଯୋଗୁଁ ସକାଳୁ ଘରୁ ବାହାରିବା କଷ୍ଟ ହୋଇ ପଡ଼ିଛି ।
ଗତ କିଛିଦିନ ହେଲା ଲଘୁଚାପ ଜନିତ ବର୍ଷା ଏବଂ ପାଗ ମେଘୁଆ ଯୋଗୁ କେବଳ ଦିନରେ ଶୀତ ଅନୁଭୂତ ହେବା ସହ ତାପମାତ୍ରା ବୃଦ୍ଧି ପାଇ ୧୭ରେ ପହଞ୍ଚିଥିଲା । ହେଲେ ଗଲା କିଛିଦିନ ହେବ ପାଗ ସମ୍ପୂର୍ଣ୍ଣ ଶୁଖିଲା ରହିବା ସହ ବିଳମ୍ବିତ ରାତିଠାରୁ ସକାଳ ୯ଟା ପର୍ଯ୍ୟନ୍ତ ଘନ କୁହୁଡ଼ି ଲାଗି ଶୀତ ଦ୍ବିଗୁଣିତ ହୋଇଛି । ଚଳିତ ବର୍ଷ ୨ୟ ଥର ପାଇଁ ପାରଦ ଖସି ୯ରେ ପହଞ୍ଚିଥିବା ବେଳେ ପ୍ରଥମଥର ପାଇଁ ଚଳିତ ମାସ ୨୭ରେ ତାପମାତ୍ରା ୯.୫ ଡିଗ୍ରୀ ରହିଥିଲା ।