ପର୍ଯ୍ୟଟକ ଜାହାଜ ଉପରେ ଏନସିବିର ଚଢଉ; ଶାହରୁଖଙ୍କ ପୁଅ ଆର୍ୟାନଙ୍କୁ ଜେରା
ମୁମ୍ବାଇ, (ଓଡିଶା ଟାଇମ୍): ମୁମ୍ବାଇରେ ହାଇ ପ୍ରୋଫାଇଲ୍ ଡ୍ରଗ୍ସ ପାର୍ଟି ଉପରେ ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ(NCB) ରେଡ୍ । ଶନିବାର ବିଳମ୍ୱିତ ରାତିରେ ମୁମ୍ବାଇ ମଝି ସମୁଦ୍ରରେ ଥିବା ଏକ କ୍ରୁଜ୍ରେ ରେଭ୍ ପାର୍ଟି ଚାଲିଥିବା ନେଇ ଚଢାଉ କରାଯାଇଥିଲା । ଏହି ସମୟରେ କ୍ରୁଜ୍ ଜାହାଜରୁ ବହୁ ପରିମାଣର ବ୍ୟାନ୍ ହୋଇଥିବା ଗଞ୍ଜେଇ, କୋକେନ୍, ଏମ୍ଡି ଇତ୍ୟାଦି ଜବତ ହୋଇଛି ।
ଘଟଣାରେ ଏନ୍ସିବି ୧୦ ଜଣଙ୍କୁ ଅଟକ ରଖିଛି । ସେମାନଙ୍କ ମଧ୍ୟରେ ଜଣେ ବଲିଉଡ୍ ସୁପରଷ୍ଟାରଙ୍କ ପୁଅ ରହିଛନ୍ତି । ତାଙ୍କୁ ମଧ୍ୟ ଏନ୍ସିବି ଅଟକ ରଖିଛି । ରେଭ୍ ପାର୍ଟି ବେଳେ ସମ୍ପୃକ୍ତ ଷ୍ଟାର୍ଙ୍କ ପୁଅ ମଧ୍ୟ ଉପସ୍ଥିତ ଥିଲେ । ତାଙ୍କୁ NCB ଜେରା କରିଥିବା ଜଣାପଡ଼ିଛି । ଘଟଣା ସହ ତାଙ୍କର କଣ ସମ୍ପୃକ୍ତି ରହିଛି ସେ ନେଇ ଖୋଳତାଡ଼ କରାଯାଉଛି । ସେହିପରି ମାମଲାରେ ଅନ୍ୟ ୯ ଜଣଙ୍କୁ ଅଟକ ରଖାଯାଇଛି । ଯେଉଁଥିରେ ଦୁଇ ଜଣ ଡ୍ରଗ୍ସ ପେଡଲର୍ ବି ଅଛନ୍ତି ।
ଏନେଇ ଏନ୍ସିବି ଜୋନାଲ ଡାଇରେକ୍ଟର ସମୀର ୱାଙ୍ଖଡେ କହିଛନ୍ତି, ‘ଘଟଣାରେ ବର୍ତ୍ତମାନ ସୁଦ୍ଧା କାହାକୁ ଗିରଫ କରାଯାଇ ନାହିଁ। କିଛି ଜଣଙ୍କୁ ଅଟକ ରଖାଯାଇଛି ଓ ତଦନ୍ତ ଜାରି ରହିଛି। ଡ୍ରଗ୍ସ ଜବତ ହୋଇଛି। ୮-୧୦ ଜଣଙ୍କୁ ପଚରାଉଚରା କରାଯାଉଛି’। ମିଳିଥିବା ସୂଚନା ମୁତାବକ ଏହି ଜାହାଜ ମୁମ୍ବାଇରୁ ଗୋଆ ଯିବା ପାଇଁ ଯୋଜନା ଥିଲା । ସୂଚନାଥାଉ କି, ଅଭିନେତା ସୁଶାନ୍ତ ସିଂହ ରାଜପୁତଙ୍କ ମୃତ୍ୟୁ ପରେ ବଲିଉଡ୍ରେ ଡ୍ରଗ୍ସ ଲିଙ୍କ୍ ସାମ୍ନାକୁ ଆସିଥିଲା । ଏହାପର ଖୋଳତାଡ ଆରମ୍ଭ କରିଥିଲା ଏନସିବି ।