୩ ଦିନ ପରେ ୧୦ ଯବାନଙ୍କୁ ଛାଡ଼ିଲା ଚୀନ

ନୂଆଦିଲ୍ଲୀ, (ଓଡିଶା ଟାଇମ୍) : ପୂର୍ବ ଲଦାଖର ଗଲୱାନ ଉପତ୍ୟକା ଅଞ୍ଚଳରେ ଭାରତ-ଚୀନ ମଧ୍ୟରେ ହୋଇଥିବା ସଂଘର୍ଷ ବେଳେ ଅଟକ ରଖିଥିବା ୧୦ ଭାରତୀୟ ଯବାନଙ୍କୁ ମୁକ୍ତ କରିଛି ଚୀନ୍ । ପିଟିଆଇର ରିପୋର୍ଟ ଅନୁଯାୟୀ, ଚୀନ ସେନା ୨ ମେଜର ସମେତ ୧୦ ଭାରତୀୟ ଯବାନଙ୍କୁ ଅଟକ ରଖିଥିଲେ । ଉଭୟ ପକ୍ଷରୁ ବୁଝାମଣା ପରେ ୧୦ ଭାରତୀୟ ଯବାନଙ୍କୁ ମୁକ୍ତ କରିଛି ଚୀନ୍ । କିନ୍ତୁ ଏହି ବାବଦରେ ସେନା ପକ୍ଷରୁ ଅଧିକାରୀଙ୍କ ବୟାନ ଜାରି କରାଯାଇନାହିଁ ।

ଗୁରୁବାର ଏହି ଯବାନମାନେ ଭାରତୀୟ ସୀମାରେ ଆସି ପହଞ୍ଚିଥିଲେ। ଦୁଇ ପକ୍ଷ ମଧ୍ୟରେ ଉତ୍ତେଜନା ବୃଦ୍ଧି ପାଇଥିବାରୁ ସୈନିକମାନଙ୍କ ସୁରକ୍ଷାକୁ ଦୃଷ୍ଟିରେ ରଖି ଏହି ତଥ୍ୟ ପ୍ରଘଟ କରାଯାଇ ନ ଥିଲା। ଏ ସମ୍ପର୍କରେ ସରକାରଙ୍କ ପକ୍ଷରୁ କୌଣସି ତଥ୍ୟ ଦିଆଯାଇ ନ ଥିଲା। ଭାରତୀୟ ସେନା ଏବଂ ବିଦେଶ ମନ୍ତ୍ରଣାଳୟ ପକ୍ଷରୁ ଗୁରୁବାର କେବଳ କୁହାଯାଇଥିଲା ଯେ ଚୀନ ସୈନ୍ୟଙ୍କ ସହିତ ସଂଘର୍ଷ ପରେ କୌଣସି ଭାରତୀୟ ଜବାନ ନିଖୋଜ ନାହାନ୍ତି।